EL EMBARGO

Señol jues, pase usté más alante
y que entren tos esos,
no le dé a usté ansia
no le dé a usté mieo...

Si venís antiayel a afligila
sos tumbo a la puerta.
¡Pero ya s'ha muerto!

¡Embargal, embargal los avíos,
que aquí no hay dinero:
lo he gastao en comías pa ella
y en boticas que no le sirvieron;
y eso que me quea,
porque no me dio tiempo a vendelo,
ya me está sobrando,
ya me está gediendo!

Embargal ese sacho de pico,
y esas joces clavás en el techo,
y esa segureja
y ese cacho e liendro...

¡Jerramientas, que no quede una!
¿Ya pa qué las quiero?
Si tuviá que ganalo pa ella,
¡cualisquiá me quitaba a mí eso!
Pero ya no quio vel ese sacho,
ni esas joces clavás en el techo,
y ni esa segureja
ni ese cacho e liendro...

¡Pero a vel, señol jues: cuidaíto
si alguno de ésos
es osao de tocale a esa cama
ondi ella s'ha muerto:
la camita ondi yo la he querío
cuando dambos estábamos güenos;
la camita ondi yo la he cuidiau,
la camita ondi estuvo su cuerpo
cuatro meses vivo
y una noche muerto!

¡Señol jues: que nenguno sea osao
de tocale a esa cama ni un pelo,
porque aquí lo jinco
delante usté mesmo!
Lleváisoslo todu,
todu, menus eso,
que esas mantas tienen
suol de su cuerpo...
¡y me güelen, me güelen a ella
ca ves que las güelo!...

__________________
HAY DOS PALABRAS QUE TE ABRIRAN MUCHAS PUERTAS: EMPUJAR - TIRAR

DE CADA DIEZ TIROS QUE PEGO, CINCO SON LA MITAD.